СИЁСИЙ ЛАТИФА
Лапландия президентининг 100 та ўйнаши бўлиб, шулардан биттаси СПИД билан касалланган экан. Қайси бири СПИД эканлиги ҳозир аниқланяпти.
Амриқо президентининг ҳавфсизлик бўйича 100 та маслаҳатчиси бўлиб, шулардан биттаси КГБ айғоқчиси экан. Қайси бири айғоқчи эканлиги ҳозир аниқланяпти.
СССР президентининг иқтисод бўйича 100 та маслаҳатчиси бўлиб, шулардан биттаси иқтисодни тушунар экан. Қайси бири эканлиги ҳозир аниқланяпти.
“Собеседник” ҳафталигининг 1990 йил 29-сонидан таржима.
ДИҚКАТ, ЯНГИЛИК!!!
Отингни сот, молингни сот, депутат бўл! Дорилфунунга «жойлаб» қўйган айғоқчиларимиздан бирининг хабарига кўра, бу йилги кириш имтиҳонларида янги сайланган халқ депутатлари ҳам фаол қатнашишибди. Масалан, битта кирувчи қайсидир имтиҳондан «2» олиб, жойида йиқилибди. Аммо тирговучи депутат (!) экан, шартта бошлаб келибди (Ўз кўзи билан кўрганлар бор. – В.). Ҳозир бола дорилфунун даргоҳида ўқияпти.
Эсиз, депутатлар 500 та, кирувчилар эса сонмингта. Акс ҳолда, ҳамма ўқишга кириб кетган бўларди-я!
ИЗОҲ. Ошкоралик муносабати билан у илм толибининг ҳам, илм тирговучининг ҳам исмларини айтмадик. Ўйлаймизки, шу хабарни ўқиб қолсалар, ўзларини таниб, иккинчи бу номаъқул бузоқнинг… гўштини емайдилар.
РЎЗНОМАГА ЗУМ СУҲБАТ
– Ўзбек тилига Давлат мақоми берилганига бир йил тўлди. Шу давр мобайнида ҳаётингизда қандай унутилмас воқеалар рўй берди?
– Та-а-к… Саккиз йиллик муҳлатни кутиб ўтирмай, беш-олтита янги сўз ўргандим!
– Ў-ў, нақадар яхши! Қайси сўзлар экан, билсак бўладими?
– Пажалиста. Та-а-к… Экстремист… дубинка… президент… Фарғона… Ўш… комендантлик соати… ем-хашак… Туркистон…
ЕТМИШ ЙИЛДАН СЎНГ КЎЧАДА
Тўқсонга кирган бир чол кўчада йигитликдаги дўстини учратиб қолди. Лекин у ўзгариб кетган экан, ўхшатди-ю, унча танимади.
– Дўппинг қани? – деб сўради ажабланиб.
– Уйда. Нимайди?
– Қийиғинг қани?
– Сандиқда. Нимайди?
– Қинли пичоғинг бўларди, ўша қани?
– Кампирим сабзи-пиёз тўғрашга ишлатиб турибди. Нимайди?
– Ия! Дўппи бошда, қийиқ белда, пичоқ ёнда бўларди-ку! Шу ўзингмисан, ишқилиб?
– Менман. Нимайди.
ВАҲИМАЧИ
“Муштум”журнали, 1990, 19-сон
Leave a Reply